إزاى الحال ؟

كثير من الشباب و الشابات دلوقتى بيتجهوا للأعمال الحرة إما لأنهم يأسوا من الحصول على وظيفة أو إنهم فعلًا مقتنعين إن الوظيفة

خنقة و سقفها ضيق، و أهم حاجة بتقلقهم شوية هى الأوراق القانونية، اللى ما يعملهاش خالص و طبعا ده خطر لأن أوراق الشركة و

أهمها عقد الشركة زى شهادة ميلاد الأنسان، مفيش شركة من غير أوراق و إلا هتبقى عاملة زى البنى أدم ساقط القيد من غير أى

حقوق.

و في بعضهم يروح لصاحبة طالب فى كلية الحقوق يعمله العقد بإعتباره محامى أهم من (فاتن حمامة في فيلم الأستاذه فاطمة) و طبعا

صاحبه يتحرج يقوله لسه مخدناش الشركات أو مذاكرتهاش فيعمله عقد من علي الأنترنت، خطورة ده كلنا كده بنعوم فى ميه البطيخ!

خلينا نعرف ببساطه الشركات و أنوعها قبل ما نعوم فى ميه البطيخ و كمان مهم جداً جداً نقرأ العقود بدقه لأنها بتحدد مسئوليات كل

طرف في الشركة و إلا هنلبس في الحيط، و قبل كل ده نركز أن الشغل شغل، لا بيتبني علي العشم ولا الصحوبيه يعنى نقعد علي

القهوه حاجة و نعمل شركة فيها التزامات

حاجة تانية يعني عايزة تركيز مش خوانه لا سمح الله بس نركزعشان نكتب كل حاجة و نتأكد إننا فاهمين بعض كويس مش حد بيقول

حاجة و الثانى فهم حاجة تانية و الثالث كتب حاجة تالتة مختلفة خالص.

الرسول -صل الله عليه و سلم- وصانا بحديث مهم جدا “إذا تداينتم بدين فأكتبوه” و فى مثل مهم جداً بيقول “كان عندى صديق و

فلوس، صديقى أستلف فلوسى، لا بقي عند صديق ولا فلوس”. الخلاصة؛ بداية أي عمل هو عقد شركة و إن شاء الله باب رزق و

فتحة خير.

أنواع الشركات للاشخاص متعددة منها؛ شركات التضامن: دى الشركة التي بين شخصين أو أكثر بقصد العمل التجاري، بنعمل عنوان

يضم أسم واحد أو أكثر من الشركاء مثلًا (شركة حمادة وتوتو) و ممكن نوع العمل اللى هنعمله زى مثلاً (شركة الأنتيخ لبيع

البطيخ). بيكون كل شريك مسئول عن الشركة مسئولية شخصية يعنى مستفيد من المكسب إن شاء الله و مسئول عن إلتزامات و ديون

الشركة في كل امواله، و يعتبر كل شريك في شركة التضامن تاجراً بشرط أن يكون غرض الشركة تجارى.

حق الأدارة: و يجوز إن الشركاء يتفقوا علي إن يكون حق الإدارة للشركاء مجتمعين أو منفردين أو لحد لوحده. مهم نأكد على إن

الشريك المتضامن مسئول في جميع أمواله عن ديون الشركة، عشان كده قرار الإدارة لازم يتاخد بحرص و بعد مناقشة و وضع قواعد،

ما ينفعش أسيب كل حاجة بالحب و لو حصل أخطاء فى الأدارة أتحرج أتكلم أو أناقش و أزعل و أتقمص و أخد جنب لأن المكسب

مشترك و الخسارة لا قدر الله مشتركة.

طيب اللى مالوش فى الأدارة و التجاره و نفسه يشارك فى مشروع يعمل إيه؟ يعمل شركة توصية بسيطة بس هنتكلم عليها مرة تانية.

طيب إيه هي المستندات المطلوبة لتأسيس شركة تضامن؟

– عقد تأسيس للشركة موقع عليه من الشركاء (يعمله حد فاهم و عنده خبرة مش صاحبنا اللي في كلية الحقوق أو نسترخص و نعمله من علي الأنترنت).

– ملخص للعقد موقع عليه من الشركاء، و يشتمل الملخص على أسماء الشركاء و ألقابهم و صفاتهم و عناوينهم و كمان عنوان الشركة.

– عقد إيجار مثبت تاريخه بالشهر العقاري أو عقد تمليك موثق بالشهر العقاري إلي يقع في دائرته العقار.

– إيصال كهرباء حديث من مقر الشركة.

– أصل بطاقات تحقيق شخصية للشركاء. طيب ما هي إجراءات تأسيسهم؟

الخطوة الاولي: كتابة عقد الشركة و ملخص للعقد.

الخطوة الثانية: الذهاب إلي السجل التجاري التابع له مقر الشركة للتأشير علي العقد و الملخص صالح للتسجيل.

الخطوة الثالثة: الذهاب إلي النقابة الفرعية لنقابة المحامين للتصديق علي عقد الشركة إذا تجاوز رأس مال الشركة عشرون ألف جنيه مصري.

الخطوة الرابعة: الذهاب الي القلم التجاري بالمحكمة الذي يقع مقر الشركة في دائرته لتسجيل عقد الشركة التجاري و التأشير عليه 

برقم و تاريخ التسجيل و نشره في لوحة الاعلانات، و تسليم صورة من العقد و الملخص للمحضرين بعد تسجيل العقد.

الخطوة الخامسة: نشر ملخص عقد الشركة في جريدة يومية للإعلانات القضائية.

الخطوة السادسة: الذهاب إلي مأمورية الضرائب التابع لها الشركة، و طلب من الموظف فتح ملف ضريبي للشركة، هيقوم الموظف

ببدء إجراءات فتح الملف و تحديد ميعاد لمعاينة مقر الشركة، ثم بعد ذلك يقوم بتحرير خطاب بأسم الشركة صالح لمدة ثلاث شهور

للتعامل به مع الجهات الحكومية حتي يتم إصدار البطاقة الضريبية.

 مصدر الخبر