ازيكم؟
في اثنين اصحاب عملوا شركة اشتغلت كويس قوي و ربنا كرمهم و في طريق عودتهم من سفر اتقلبت العربية و ربنا افتكرهم، بعد الحداد جالي زوجاتهم لترتيب الأوضاع و تقسيم الميراث، زوجة الاول معها ولدين و زوجة الثاني معها بنتين.

زوجة الاول مغرورة كده و مقدامه و متزعمه الموقف لأنها معاها ولدين و شايفه أن مادام معاها ولدين محدش هيورث معاها لأن الولد بيقش، و زوجة الثاني قاعدة كده مستنيه الفرج لما تشوف هتطلع هي و بناتها في الليلة دي بأيه!

المهم صفينا الشركة و خلصنا الألتزامات اللي عليها -ديون تجار و تصفية ضرايب و شوية الحاجات دي يعني- و اتفضل للميراث مشفي مليون جنيه لكل شريك.

زوجة الشريك الأول اللي معاها الولدين كانت سعيدة جداً و شايفه أن المليون جنيه اللى تخص جوزها كده من نصيبها هي و الولاد طبعا ما هي معها ولدين، أما التانية بقي حزينة و شايفه ان المليون اللى تخص جوزها هتبقى مشاع، أي حد هيورث معها، أُمَّال! ما هي معها بنتين.

قلت لهم اسمعوا يا هوانم عايزين نفهم حاجة مهمة اوي في تقسيم الميراث، البنات اصحاب فروض؛ يعنى ليهم نصيب معلوم و محدد أما الأولاد بقى بيورثوا عصب؛ يعنى اللى يفضل من التركة بعد أصحاب الفروض، تانى، يعني ايه؟

يعني البنات لها فروض بمقدار ثابت و محدد في التركه ياخدوه لو انطبقت السما علي الارض أما الولاد فهم بيورثوا عصب؛ الباقي اللى يفضل، الوحيد اللى بيستثنى و يورث فرض زى البنات هو الأب او الجد. 

يعنى هناخد كل تركه و نسأل عندنا بنات، صفاتهم ايه؟ بنت، زوجة، أم؟ نطلع نصيبهم الأول و بعد ما نطلع بقي الفروض الباقي يروح للعصب. 

تعالوا بقي نشوف في المليون جنيه اللى تخص كل شريك؛ الاول ابو الولدين هنطلع – 1/6 (لأم المتوفى)، 1/8 ( للزوجة)، 1/6 ( لأب المتوفى )، الباقي بقى للعصب؛ للولدين و نصيب الولاد من المليون يبقي 543.000.

نيجى للشريك التانى أبو البنات هنطلع 1/6 (لأم المتوفى)، 1/8 ( للزوجة)، 1/6 ( لأب المتوفى)، 2/3 (للبنتين(.

طيب الأنصبة كده اكبر من التركة، نعمل ايه – نخصم من كل نصيب فتفوته صغيره علشان نظبت الحسبة – بعد الخصومات دى كلها هيبقى نصيب البنتين من المليون بتاع ابوهم 666.666.
تانى؛ الولدين 543.000 و البنتين 666.666.

يعنى الولد بيقش فى الكوتشينة بس، فى الميراث البنات اولاً و الولاد البواقى.

 

مصدر الخبر