ازي الحال

عايزة أقولكم حاجة مهمة، موسم الدراسة ابتدى و داخلين علي midterms و بدأ موسم أبو وردة في كل بيت و للي ميعرفش أبو وردة؛ أبو وردة ده مقصود بيه اى شىء يتلبس فى الرجل و سهل القلع و التصويب على الهدف، اللى هو عيل بيجرى من قدام أمه و هى بتشد شعرها لأنه معملش الواجب و ده طبعا بعد ما استنفذت كل الطرق الودية فى التفاوض معاه حوالين الواجب. من أول إعمل الواجب واتفرج على الكرتون، إعملي الواجب و هجبلك أيس كريم، و خلصت الرد على الأسئلة الكونية الفلسفية العميقة اللى بيسألها الأولاد من أول اللى فى KG لحد اللى فى ثانوىة عامة عشان يجننونا ونبطل نكلمهم علي المذاكرة.

بعد استنفاذ كل المفاوضات و الحوارات يظل أبو وردة هو سيد الموقف فى كل البيوت…

-السؤال ليه؟

-ليه بنحول البيوت لساحة صراع علشان المذاكرة؟!!

-ليه بنخلق علاقة بين المذاكرة و الدراسة و النكد؟!!

-إحنا عايزين إيه؟؟؟

عايزين العيال تطلع بتفهم و لا عايزين معاهم شهادة متعلقة على الحيطة و هما مش عارفين حاجة؛ لا خبرات عملية و لا ثقافة و لا تفكير منطقى…

ليه تخلى الدراسة و المدارس تدمر العلاقة بين الام و الأولاد و تحولها الى أمنا الغولة، طول الوقت صريخ و توتر؟؟؟

خلينا نعرف أن الأم بتتعرض لضغط هائل؛ من المدرسة اللى اصلا ما بتعملش اللى عليها ومن الأب اللى عامل زى الناقد الرياضى اللى بيحلل ثم يحلل و لما يمسك المنتخب يجيبه الأرض!

لا هو بيساعد فى المذاكرة و لا بيسكت. مين اللي قال اننا محتاجين الكم ده من المذكرة أصلاً!!!

بصوا بقى يا هوانم، عندى كلمتين فيهم الخلاصة، مفيش حاجة تستاهل الجو و لا الضغط ده، اللى حاطين المناهج مش حاطين هدف و لا عارفين هما عايزين ايه، يعنى مثلاً التاريخ الفرعونى و الإسلامى و الحديث بتاع محمد على، بيتدرسوا كده على التوالى من اول رابعه فرعونى خمسه اسلامى سته حديث و زيهم اعدادى و زيهم ثانوى! جدول الضرب من اول تانية ابتدائى لرابعه و العيال فى الأخر بتستخدم اله حاسبة!

هدى اعصابك كده و ركزى على الهدف من التعليم مش التفاصيل اليومية بتاعة الhome work…

انتى عايزة يعرف عربى، حساب، انجليزى…إلخ

خلية يعرفهم من كتب المدرسة أو مجلة ميكى، خديهم و روحى مكتبة يختاروا كتب حلوة ملونه يقروها هيبقوا شطار اكثر من لو ذاكروا كتب المدرسة.

خلى العيال ترسم و تلعب و اللى يدى هوم ورك كتير روحى اتخانقى معاه! العيال لازم تلعب!

سيبك من المحشى و التمثيلية و أقعدى اقري جنبهم أو معاهم أو العبى و ارسمي معاهم، و لو جوزك اتخانق أنك مش قاعدة معاه و مهتمة بالعيال بس، اقفلى التليفزيون و قولى له اتفضل معانا.

امدحى العيال و حبى اللى بيعملوه و ممكن تتعلموا حاجات من على النت، اللى هيتعلموه انهاردة هيتكرر بكرة…

و أسمعى منى، بقالى 20 سنة بوظف ناس مفيش علاقة بين التفوق الدراسى و التفوق المهنى، لأن التفوق الدراسى مبنى على الحفظ و الصم مش الفهم و لا الابداع.

ما تضيعيش عمرك و عمر عيالك على الصريخ و جربى أدوات ثانية هتلاقيهم بيحبوا الدراسة و شطار أشطر من مدرسينهم.

مصدر الخبر