أزيكم؟

فى مثل بيقول “اللى جوزها يقولها يا كودا يلعبوا بيها الكورة” يعنى الست اللى جوزها ما يحترمهاش قدام الناس، الناس هتستهين بيها.

بس أنا عايزة اقوله بطريقة مختلفة، “اللى تقول لنفسها يا كودا الكل يلعب بيها الكورة”، القضية بتبدأ بيكى أنتى؛ تقديرك لنفسك دي من الحاجات المهمة أوي من اللي بلاحظه أن كتير أوي من البنات و السيدات طول الوقت تحس أنها ما بتعملش حاجة و معندهاش قدرات و ملهاش لازمة و كأنها عبء على الكرة الأرضية لأن جوزها او اللى حواليها بيقولولها كده.

تبقى بتعمل 100 حاجة و طول الوقت يتقال لها هو “انتى بتعملى إيه؟!”، سؤال مستفز ومحبط انا عارفة صعبت عليا قوى الست قابلتنى بتشتغل كوافيره واقفة على رجلها 12 ساعه فى اليوم و مفيش ولا يوم أجازة و ترجع تعمل الأكل و تنضف و تاخد بالها من العيال و جوزها يقولها انتى بتعملى إيه؟ إنتَ لا زوجة ولا أم.

الغريب ان العيال بيكبروا و هما كمان بدأوا يقولوا لها كده، و واحد خطب و هى بتساعده يجهز نفسه و هو كمان بيقول كده!!

قلت خلاص اضربى كرسى فى الكلوب و خدى أجازة وقولى لهم أنا هقعد فى البيت، قالت لى ماقدرش دخل ابوهم ما يأكلناش عيش حاف -يا نهار اسود- يعنى حضرتك تقريباً شايله البيت و مش عارفه تقولى كده لنفسك وتقوليلهم، و انتى نفسك حاسه أنك مقصره؟!!

ده الستات غلابه قوى؛ طيب تخيلى كده أنك مش موجودة فى حياتهم تفتكرى هيعملوا ايه؟ من اول الشرابات اللى بتتقلع و تترمى فى كل حته و ترجع لهم نضيفة لحد الأكل اللى بيتعمل بايدك و بفلوسك لحد المحروس اللى كمان بتجوزيه.

اسمعوا بقى؛ خلينا نبدأ من نقطة الصفر، مفيش ست مقصره، حتى الست اللى ما بتشتغلش بأجر مادى هى بتشتغل فى بيتها؛ شغاله و مدرسة و دادة وسواق و ممرضة، شوفوا دول كلهم أجرهم كام! تعرفى أنتى موفره إيه؟!! كل واحدة عندها ميزة محدش عنده زيها و متسمحيش لحد يقولك أنتى بتعملى إيه أو بالأساس متستنيش شكر من حد أشكرى انتى نفسك و قدريها و دلعيها، يعني مثلاً اشكرى نفسك أنك ربيتى الولاد علي التفاهم حتي من و هما صغيرين و أنك مضربتيش فيهم حد، دي حاجة مهمة اوي.

اشكرى نفسك أنك بشتغلى و دخلك بيرفع مستوي حياتك و حياة اولادك، أو أنك بتعملى أكله محصلتش مفيش حد غيرك بيعرف يعمل زيها، كل ست مميزة؛ زي بصمة الايد و بصمة الصوت مش متكررين. لازم نقبل نفسنا زي ما أحنا، يعني أنا قدراتي إيه و القدرات دي اقدر اعمل بيها حاجات مميزة عشان مبقاش حزينة على نفسى و مش بقدرها و مستنية حمد و شكرانية من حد و المفروض مسمحش لحد لا يقولى يا كودا ولا يتعامل معايا وحش، اتفقنا؟؟

كل سنه و كل ام و ست طيبه!

مصدر الخبر