و انا ابنى فى تانية ابتدائى جالى استدعاء ولى امر و طبعا كأم مستجدة جريت على المدرسة اشوف ايه اللى حصل، قابلتنى مسئولة القسم الأنجليزى و معاها الولد و قالتلى ان الولد مستواه وحش قوى يا مدام و مش مستجيب و انتم فى البيت مش بتشوفوا الكوميونيكشن بوك-communication book- و ثبتتنى قدامها و فضلت تنفض في و تمارس كل انواع السلطة و شوية شوية هتقول اقفى فى الحيط و ارفعى ايدك و طبعا الأمر لا يخلو من حشر الأنجليزى مع العربى! مش عارفه ليه و هى بتكلم ام مصرية!

و انا هادية جدا و بناقشها بالعقل ان العملية التعليمية مش طالب بس و لازم نبص علي المدرسين و نشوف ازاى المدرسين مش جاذبين للأطفال و ان احنا علينا دور و انتم عليكم دور…

وشها احمر و ضربتنى كلمة انجليزي “اتس تو ليت يا مدام” ابنك فاشل يا مدام!

طبعا متخيلة انها اديتنى بالقاضية، مع الكلمتين الأنجليزى و الطريقة دى فى الكلام معروف انها بتعمل حاجتين؛ اولا: انها رمت الكورة فى ملعبى و انا اللى ام فاشلة و لازم احس بالذنب.

ثانيا: حبت تربكنى لانها تخيلت ان هدوئى ضعف او قلة حيله لكنها متعرفش انها داست على زرار الشر جوايا و انى فاهمه المشكلة فين كويس، فقلت لها: اولا كلمينى عربى انا مش تلميذه عندك.

ثانيا: انتى بتقولى على ولد فى تانية ابتدائى انه فاشل -حضرتك درستى ده في انهى كتب تربيه؟!! يعنى طالب عمره الدراسى سنتين يبقى فاشل امال مدرسة زيك مش قادرة تفهم ولد تبقى ايه؟؟؟

ثالثا: أ، ب تعليم بيقول إن العملية التعليمية مدرسة و مدرسين و طالب، راجعوا مدرسينكم و قيموا كفائتهم!

رابعا: الكوميونيكشن بوك بتاعك بصى عليه و صححى الاخطاء الاملائية لمدرسينك الأول اللى مش بيعرفوا يكتبوا انجليزى أو حتي عربى!

خامسا: انا هطلب من المدرسة التحقيق معاكى لانك لا تربوية و لا ليكى علاقة بالتدريس و لا علم نفس الأطفال، لما تجيبى عيل فى ايدك و قدامه تقولى انه فاشل، ده يبقى إيه؟!!

سادسا: انا هبعت شكوى لوزارة التربية و التعليم فى اللى حصل و هطلب منهم التحقيق و تقييم المدرسة.

سابعا: بخصوص الولد، اتس نيفر تو ليت يا مدام!

الست دى عملت حاجة مهمة قوى؛ انها لم تسمح لاحد انه يحسسها بالذنب و عارفة حقها كويس لأنها فاهمة و عارفة حقها كويس أوي. القوة مش الصوت العالى!

ما تسمحيش لحد يتعامل معاكى زى التلامذة لان الناس بتهرب من فشلها بصبه على الأخرين! كل واحد يشيل مسؤلياته، انتي مش هتشتغلي مدرسة عشان فشل المدرسين!

لما تكوني عارفة حقك كويس أوي تعرفي تتعاملي مع كل الناس!

مصدر الخبر