سمعتوا عن حملة التاء المربوطة؟؟

حملة مهمة جدا عملها المجلس القومى للمرأة ودعمتها قناة القاهرة والناس، عشان ايه؟

اقولكم…

عشان تعرف كل بنت وكل ست ان التاء المربوطة دي هى علامة على اجمل الكائنات؛ الستات والبنات دي مش ضعف ولا نقص، دي قوة! يعني مثلا قلب الستات اقوي عشان احنا اللي بنولد لامؤاخذة، وبنستحمل ألم مايتحملوش قلب راجل علشان نكمل الحياة.

احنا اللي ادانا ربنا نعمة ومسئولية نكمل الخلق، هو بس يدينا الاشارة و احنا نقعد تسع اشهر شغالين على المهمة ورغم ان الحمل وهن على وهن- يعنى ضعف على ضعف- تلاقينا جامدين جدا وشطار جدا، بنهتم بنفسنا والبيبى اللى جوا وكل اللى حوالينا ونروح الشغل و لما يجي الطلق بنولد، عادى يعنى! مش زى ناس حبايبنا لما يجيلهم شوية برد يبقوا عايزين منظمة الصحة العالمية تدخلهم غرفة الإنعاش! طبعاً عارفين باتكلم على مين! بس كلة إلا القط مشمش…

و بعد كل ده يقولك اللغة العربية مذكرة- الخطاب فيها لازم يكون مذكر- في المناسبات المهمة يقولك السيد الوزير ونبص مانلقيش سيد و لا حاجة -نلاقي ست جدعة بميت راجل مش بنقول السيدة الوزيرة ليه؟!!

راحت فين التاء المربوطة؟ ولا احنا في الهم مدعوين وفي المناصب منسيين!

يقولك لأ! المناصب لا تؤنث! جبت منين الكلام ده يا عم؟؟ امال جمع المؤنث السالم راح فين؟؟ ده القوة انثي و الفرصة انثي و الثروة انثي!

يقولك لأ! لو فى مذكر واحد وكل الموجودين مؤنث خلي الخطاب مذكر!

لامواخذة يا عم سيبويه -سيبويه ده اللي حط قواعد اللغة العربية- علي فكرة كان فارسي مش عربي.

المهم مفيش الكلام ده خالص!

لو دخل مذكر يبقي المخاطب مذكر ومؤنث، القرأن قالنا كده، الأيه 35 من سورة الأحزاب- معجزة لغوية الأية دى سبقت حتي المواثيق والبروتوكلات الدبلوماسية العالمية فيه 10 مخاطب ذكر وانثي.

“إنَّ الْمُسْلِمِينَ وَالْمُسْلِمَاتِ وَالْمُؤْمِنِينَ وَالْمُؤْمِنَاتِ وَالْقَانِتِينَ وَالْقَانِتَاتِ وَالصَّادِقِينَ وَالصَّادِقَاتِ وَالصَّابِرِينَ وَالصَّابِرَاتِ وَالْخَاشِعِينَ وَالْخَاشِعَاتِ وَالْمُتَصَدِّقِينَ وَالْمُتَصَدِّقَاتِ وَالصَّائِمِينَ وَالصَّائِمَاتِ وَالْحَافِظِينَ فُرُوجَهُمْ وَالْحَافِظَاتِ وَالذَّاكِرِينَ اللَّهَ كَثِيرًا وَالذَّاكِرَاتِ أَعَدَّ اللَّهُ لَهُم مَّغْفِرَةً وَأَجْرًا عَظِيمًا”

هنا مقالش اللغة العربية مذكرة لأنه بيخاطب بشر؛ مذكر ومؤنث- والقرأن أصل اللغه العربية مش الأخ سيبويه!

عشان كده مش هنسمح لحد يقولنا الكلام من غير التاء المربوطة! من هنا ورايح السيدة الوزيرة، السيدة الاستاذة، السيدة المحامية، لحد إن شاء الله السيدة رئيسة الجمهورية…

 

مصدر الخبر